Act 25 | DOB | STEP | Pesito nina 'imai Sisalia, ga 'ie'ale 'ina etoloina, ga 'asiyata 'etoi sigumwala ta 'itu'e Yelusalema.

Acts 25

Paulo 'isida be Sisa 'ena 'ida etala

1 Pesito nina 'imai Sisalia, ga 'ie'ale 'ina etoloina, ga 'asiyata 'etoi sigumwala ta 'itu'e Yelusalema. 2 Ta totaliya sinabwadi be me Yudia 'idi 'inapwanao simai, ga 'idi e'ewa Paulo manuna sisimanena, 3 ga Pesito 'ena sisidasida waiwai sigwae, “Kapekapeyana be Paulo 'uetunenama Yelusalema, be bada 'aetala?” Ta 'idi nuwanuwa 'ai'aila nate, 'aene Paulo sida loemwawasi 'edaya, tuta nina 'abo 'imeemai.

4 Ta Pesito 'ieona limedi, 'igwae, “Geya'abo yatagwatagwala, ta esiya Paulo Sisalia deliya tuga 'ida miyami, be 'iabe 'abo'agu yaiila Sisalia, 5 ta 'abo nuwanuwami, 'enega 'imi toloinao ma'egwao 'amwa'uta, be to'ase 'imi e'ewa Paulo manuna nada wada etala.”

6 Ta wiki 'ebweuna ta tupwana namo 'ediya 'imiyami, ta 'enega 'imwa'uta Sisalia, ta tomwa 'iulisinaya, ga etala 'ana 'ebemi 'ena 'imiyatowa, ta 'iloina be Paulo sida me'ena. 7 'Enega Paulo 'imai, ga me Yudia nidi taudi Yelusalemega simwa'utamaya, sitoolo sakowasiyena, ta 'enega 'idi e'ewa Paulo manuna sisimanedi, ma idi gamwasowala, ta yauna 'idi simana nidi nigeya 'adi 'ai'ailamo.

8 Ta Paulo 'idi ona 'iula bodebodedi, 'igwae, “'Abo'agu nigeya me Yudia 'idi loina, nai Anuwa Tabu 'ana loina, nai Sisa 'ina loina yale'oale'oa.”

9 Ta Pesito sa'i nuwanuwana be me Yudia 'ida giegwausowalidi, 'enega Paulo 'ieona limena, 'igwae, “Mwa'adega, nuwanuwayo be Yelusalema 'ena 'ututu'e, be 'amu e'ewao gete manudi waetala mataguya?”

10 Ta Paulo 'igwae, “Geya nuwagu 'igu etala manuna me Yudia siloinegu, manuna nigeya 'ebweuna to'ase 'ediya yagiegie loegesiye, ta gete ni'atu 'umwalatonina. Ta esiya me Loma 'imi 'ebe etala 'enaya yatootoolo, ta gete 'ilobwenegu. 11 'Eguma nadigega 'aene 'abo'agu tole'oa loina be 'enega loegesi gete manuna 'ilobwenena yada mwawasa, bobo'ana. Mwawasa nigeya yamatamatautei. Ta 'abo nigeya 'ebweu 'igu to'umalina walobaloba 'idi e'ewa 'ediyega, nigeya 'ilobwelobwene be 'uda 'ebwayaegu 'ediya, ta esi kini sinabwana, tauna Sisa, 'ina etala nuwanuwagu.”

12 'Enega Pesito nina 'iapwesa ga 'ina tosinasinapuyao ma'enao si'awagwae, ga 'iilama ma ina e'isa, ta 'igwae, “Bobo'ana, nuwanuwayo kini 'ina etala, 'enega kini Sisa 'ina etala 'ena yada etuneyo.”

Kini Agalipa mamwanena siapwesama

13 'Asiyata 'aina sigumwalaya, ga kini Agalipa mwanena Belinisi ma'iyana Sisalia 'ena siapwesa, sabi ona lokagutoki Pesito 'enaya. 14 Ga 'idi miyami 'asiyata yauna 'enaya, Pesito kini Agalipa 'ena Paulo 'ana e'ewao 'isimanedi, 'igwaegwae, “Tai 'ebweu gotei deliya Pilikesa 'ipilisinena. 15 Tauna tai nina manuna, lowa Yelusalema 'enaya yamiyami, ta me Yudia 'idi totaliya sinabwadi be 'inapwanao 'eguya sisimanena, ta sisidegu 'aene yada loine 'ina to'umalina manuna. 16 Ga yaeonedi yagwae, ‘Nigeya me Loma 'ima bubuna nadigega 'aene tomota 'emiya 'atagwala 'imi loinao manudi, ta esi 'ilobwenena be nugana etala tada guinuwa be 'imi e'ewao be tauna 'ina eyaseyase wada simana apwesedi.’

17 “'Enega sideli egogonama gete 'ena, ta nigeya yaso'iso'i, ga tomwa 'iulisina ga 'ebemi etala 'ena yamiyatowa, ta yaona, ga tai nina si'au'ewenama. 18 Ta 'ana toe'ewao nidi sitoolo, ta 'igu nuwanuwa 'iabe to'ase 'ebweu 'ina to'umalina manuna sisimana. Ta nigeya sa'i, 19 ta taudi namo 'idi tapwalolo manuna sionaona, be 'ebweu tai ni'atu 'imwawasa, 'ana esana Yesu, ta Paulo 'isimasimana 'aene Yesu nina mayawasina 'imiyami. 20 Ga 'abo'agu yaenuwanaluwa, mwa'adega be yage gete manuna yada loina'esa, 'enega Paulo nina yaenaidena 'abo sawesawenaya 'itutu'e Yelusalema be nada sida etala.

21 “Ga Paulo nina 'iguitoyasa, ta Sisa 'ina etala manuna 'isida. 'Enega yatagwalena ta deliya 'ida miyami bemi, 'ana laba 'eda 'aloba be yaetune Sisa 'ena.”

22 Ga Agalipa Pesito 'ieonena, “'Abo'agu wate nuwanuwagu be tai nina ina ona yada nono.”

Ta Pesito 'igwae, “Bobo'ana, gibwa'i yabwauyenama be 'ioona.”

23 'Enega tomwa 'iulisina ga Agalipa be Belinisi simai, ma 'adi 'oama esaesa, ga anuwa 'ebe deliegogona 'ena silugu, ta boda saiya 'ana toloinao be 'asa nina 'ana 'inapwanao siaesotedi ma idi 'amayaba. Ta Pesito 'iloina ga Paulo si'au'ewa luguyena.

24 'Enega Pesito nina 'iona, “'Oyo kini Agalipa, be 'omi waegogonama maibo'ami, tai gete wa'itai. Tauna manuna me Yudia maibo'adi Yelusalema 'enega, be wate sena gete 'enega, sisidegu ta siona waiwai 'eguya, sigwae, ‘Tai nate mwawasa namo tuga 'ilobwenena.’ 25 Ta nigeya 'ebweu 'ina loegesi yalobaloba be manuna 'ida mwawasa, ta tauna nuwanuwana be 'ida kini sinabwana Sisa 'ena 'ida etala, 'enega yaloina be yada etunena Sisa nina 'enaya.

26 “Ta nigeya 'ebweu 'ina loegesi manuna, be 'ida 'inapwana Sisa 'ena yada 'etoladi. Gete 'enega ya'au'ewenama matamuya kini Agalipa, be 'omi wate maibo'ami, be 'enega 'aene etala gete mulinaya 'ina loegesi 'ebweu taloba, be manuna ya'etoladi Sisa 'enaya. 27 Manuna nigeya 'ana 'ita bobo'ana 'abo tomiya yoniyonina 'ebweu taetune, ta nigeya 'ebweu to'ase e'ewa manuna tae'itae.”